പുഴയോരം

ഉള്‍വിളി

2010-01-29T02:34:00.000-08:00

ചാരം മൂടി നീയെത്ര നാളു-
റങ്ങിടും, കനലായെരിയാ
തെന്‍റെ സ്വപ്നമേ,
ഉള്‍ക്കാഴ്ച്ചകള്‍ കെട്ടുപോകില്‍
പിന്നെയാരോര്‍ത്തിടും നിന്നെ-
യൂതിപ്പൊലിപ്പിക്കുവാനെന്‍
നെടുവീര്‍പ്പുകള്‍ പോരയോ...?!

അകലം

2009-12-08T23:19:00.000-08:00

നമ്മള്‍ക്കിടയില്‍
ഒരു മഞ്ഞുമലയുടെ
അകലമുണ്ട്
അല്ല, ഒരു മഞ്ഞുമലയുടെ
അകലമേയുള്ളു
ഊഷ്മളമായൊരു
പുഞ്ചിരിയില്‍
അതങ്ങുരുകി ഒലിച്ചോളും
ഒന്നു ചിരിയ്ക്കൂ.....

സ്വപ്നം

2009-12-02T11:44:00.000-08:00

നീ അരളിപ്പൂക്കള്‍ കണ്ടിട്ടുണ്ടോ?
വിരല്തുമ്പോളം പോന്ന, പാല്പാടയുടെ നിറമുള്ള, ചെറിയ അരളിപ്പൂക്കള്‍?
ഇന്നലെ എന്റെ സ്വപ്നത്തില്‍ നിറയെ അരളിപ്പൂക്കളായിരുന്നു; വാഴനാരില്‍ അരുമയായ് കോര്‍ത്ത അരളിപ്പൂമാലകള്‍.
അതിന്റെ ഹൃദ്യമായ സുഗന്ധത്തിലേക്കാണു ഞാനിന്നു കണ്‍തുറന്നത്.
പുകമറയ്ക്കപ്പുറത്തെ കാഴ്ചപോലെ, ദൃശ്യങ്ങള്‍ അവ്യക്തമായിരുന്നു.
ഓര്‍ത്തെടുക്കാന്‍ ശ്രമിക്കുംതോറും അവ അകന്നകന്നു പോയി. തൊടിയിലെ അരളിമരവും, വാഴയിലക്കുമ്പിളില്‍ പെറുക്കിയിട്ട അരളിപ്പൂക്കളും കണ്ടുമറന്ന ചിത്രത്തിലെ ഫ്രെയ്മുകള്‍ പോലെ മനസ്സില്‍ തങ്ങിനില്പുണ്ട്.
കിടക്കുമ്പോള്‍ ഓര്‍ത്ത മുഖങ്ങളില്‍ ആരായിരിക്കും അരളിപ്പൂക്കളുടെ സുഗന്ധമായി എന്റെയരികില്‍ വന്നത്?
നീയാണോ? നിന്റെ ഹൃദയത്തിനു അരളിപ്പൂക്കളുടെ നിറമാണോ?

കാത്തിരിപ്പ്

2009-12-02T11:40:00.000-08:00

ഓക്ക് മരങ്ങളും മേപ്പിള്‍ ചില്ലകളും മുന്തിരി വള്ളികളും നിറങ്ങളുടെ മേലാപ്പ് ചൂടുമ്പോള്‍ ഹേമന്തം ആഗതമായെന്നു നിന്നെ പോലെ ഞാനുമറിയുന്നു. താഴ്ത്തി വെച്ച ചില്ലുജാലകതിനപ്പുറത്ത് ശിശിരം കനത്തു മഞ്ഞായി പെയ്യുമ്പോള്‍ ഞാനെന്റെ കമ്പിളി തലക്കുമേലെ വലിച്ചിടും. ഞാനെന്റെ ഉള്ളില്‍ കിടന്നുറങ്ങും. വസന്തത്തിനു വേണ്ടിയാണു ഞാന്‍ കാത്തിരിക്കുന്നത്. ഇലനാമ്പുകള്‍ വരുംമുന്പേ പൂക്കള്‍ കൊണ്ട് ചെറിമരത്തിന്റെ ചില്ലകളെ പട്ടുടുപ്പിക്കുന്ന വസന്തം

പൂക്കള്‍

2009-10-10T13:50:00.000-07:00

അസൂയ

2009-10-05T11:48:00.001-07:00

അപ്പുറത്തെ മുറിയില്‍ നിന്നു

മദാമ്മപെണ്ണിന്റെ സീല്‍ക്കാരം

മരച്ചുവരു തുളച്ച് ഇപ്പുറമെത്തുമ്പോള്‍

ഞാന്‍ 'പ്രമദവനം' ശബ്ദം കൂട്ടി വെയ്ക്കും

...ന്നാലീ പെണ്ണിനൊന്നു പതുക്കെ പുളഞ്ഞൂടേ....?!

സഹവീടന്റെ സമയം!

അവന്‍ നന്നാവില്ല.

'നീയെന്തേ നന്നാവാത്തെ'യെന്നവന്‍

നാളെ എന്നോട് ചോദിക്കുമോ..?

ഓര്‍മ്മകളുടെ തീരം

2009-08-24T19:53:00.000-07:00

ഓര്‍ത്തോര്‍ത്ത് ഓര്‍മ്മകളുടെ അറ്റത്ത്‌ ചെന്നാല്‍ പുഴ കാണാം. പുഴയിലെക്കിറങ്ങുന്ന കല്‍പടവുകള്‍ കാണാം. ചാഞ്ഞു നില്‍ക്കുന്ന ആല്‍മരം കാണാം. വെളുപ്പാന്‍ കാലത്ത്, പുഴയെ പുതപ്പിച്ചു കിടത്തിയ തൂമഞ്ഞിന്റെ കമ്പളം കാണാം. അക്കരെ നിന്നും പുഴയിലേക്കിറങ്ങി നില്‍ക്കുന്ന പാറക്കൂട്ടങ്ങള്‍, അതിനുകീഴെ നീരാളികള്‍ വാഴുന്ന, നിഗൂഡതകള്‍ ഒളിപ്പിച്ചുവെച്ച കയം, കുട്ടിക്കാക്കാടെ തോണി, ബിരിയാണിചെമ്പില്‍ പുഴ മുറിച്ചു കടക്കുന്ന സാഹസികനായ അയല്‍ക്കാരന്‍, നീലപ്പൂക്കള്‍ കൊണ്ട് പുഴയിലേക്ക് പുഴ്പവൃഷ്ടി നടത്തുന്ന പേരറിയാമരം , കണ്ണന്താളികള്‍, കൈതക്കൂട്ടങ്ങള്‍ ....ഓര്‍മ്മകള്‍ക്ക് പുഴവെള്ളം പോലെ തെളിച്ചവും സമൃദ്ധിയും.

എന്നെങ്കിലും സംഭവിക്കാവുന്ന ഒരു സ്വപ്നം

2009-08-18T09:38:00.000-07:00

മാനുകാക്കാടെ (ഞങ്ങടെ പാടത്ത് കൃഷിപ്പണിയും മരുന്നടിക്കലും ഒക്കെ ചെയ്യുന്ന നിത്യധ്വാനിയായ കൃഷിക്കാരന്‍) പിന്മുറക്കാരില്‍ ആരെങ്കിലും ഒരാള്‍, എടപ്പലം സ്കൂള്‍ ഗ്രൗണ്ടില്‍ നിന്നും ഇതു പോലെ ഒരു കൊച്ചു വിമാനത്തില്‍ പറന്നുയര്‍ന്ന്ചളമ്പ്രക്കുന്നും രായിരനെലൂര്‍ മലയും അതിരിടുന്ന വിശാലമായ പാടശേഖരങ്ങള്‍ക്ക് മുകളിലൂടെ താഴ്ന്നു പറന്ന്മരുന്നും വളവും വിതറി തിരിച്ചിറങ്ങുന്ന ഒരു സുന്ദരന്‍ സ്വപ്നം. എന്നെങ്കിലും നടക്കുമായിരിക്കും. പാടശേഖരങ്ങള്‍ അവിടെ ഉണ്ടാകുമോ എന്തോ.. മാനുകാക്കാടെ രണ്ടു മക്കളും ഡ്രൈവര്‍മാരാണ്. അവരുടെ മക്കള്‍ പൈലറ്റ് ആവില്ലെന്നാര് കണ്ടു?!

നേര്

2009-08-17T21:15:00.000-07:00

പൊട്ടോളം പോന്നൊരു നേര്
നോക്കി നില്‍ക്കെ ഒരു തീപന്തമായി
പിന്നെയൊരു തീഗോളമായി
എന്നെയങ്ങു വിഴുങ്ങിക്കളഞ്ഞു

വൈക്കോല്‍ ചുരുട്ടുകള്‍

2009-08-17T13:52:00.000-07:00

ചില മോഹങ്ങള്‍

2009-08-16T00:31:00.000-07:00

ഗുല്‍മോഹര്‍ ചില്ലകള്‍ ചെമ്പട്ട് വിതാനിയ്ക്കുന്ന രാജവീഥിയിലൂടെ, ഞാനിഷ്ടപ്പെടുന്ന ഭൂതകാലത്തിന്റെ നേര്‍വഴികളിലൂടെ, പാലക്കാടന്‍ കാറ്റിന്റെ ഭ്രമിപ്പിക്കുന്ന ആലിന്ഗനത്തിനു വെറുതെ നിന്നു കൊടുത്ത്, എത്ര കോതിഒതുക്കിയാലും അനുസരിയ്ക്കാത്ത മുടിയിഴകളെ അവയുടെ പാട്ടിനു വിട്ട് അപരിചിതനായി എനിക്ക് ഒന്നൂടെ നടക്കണം...ഒരിക്കല്‍ കൂടി...

അഗ്നിപര്‍വ്വതത്തിന്റെ ഹൃദയം

2009-07-27T08:16:00.000-07:00

അഗ്നിപര്‍വ്വതത്തിന്റെ ഹൃദയം
എപ്പോഴും ഒരേ താളത്തില്‍ മിടിക്കുന്നില്ല
ഇടയ്ക്കൊന്നു ചിതറിത്തെറിച്ചും
പിന്നെ തെല്ലൊന്നടങ്ങിയും
ഗദ്ഗദത്താലൊന്നു വിങ്ങിയും
ആസുരമായൊന്നു താളം തെറ്റിയു-
മങ്ങനെ....
എന്നിരിക്കിലും,
ഉരുകിത്തിളക്കുന്ന ലാവയില്‍
ഒഴുകിപ്പരക്കുന്നത്, നിണമല്ല -
എന്റെ ജീവന്‍ ആണെന്നറിയുക

ദൈവത്തിന്റെ വില കുറഞ്ഞ തമാശകള്‍

2009-07-26T22:13:00.000-07:00

തീരത്തെഴുതിയ പേരുകള്‍
പെട്ടെന്നൊരു തിര വന്നു
മായ്ച്ചു കളയും പോലെ,
മണലില്‍ പതിഞ്ഞ കാല്‍പാടുകള്‍
ഒരു ചെറു കാറ്റിന്റെ കൈ വന്നു
മൂടിക്കളയും പോലെ,
പലതും പലതും
മാഞ്ഞും മറഞ്ഞും പോകുമ്പോള്‍
‍ഒരു വേള,
കരയണോ ചിരിക്കണോ
എന്നറിയാതെ നാമൊന്നു കുഴഞ്ഞു പോകും
ദൈവത്തിനു മാത്രം ചിരിക്കാന്‍ കഴിയുന്ന
ചില വില കുറഞ്ഞ തമാശകള്‍.....

മഴയോര്‍മ്മ

2009-06-13T18:45:00.000-07:00

വീണ്ടുമൊരു ജൂണ്‍ മാസം.
നാട്ടിലിപ്പോള്‍ മഴ പെയ്യുന്നുണ്ടാവും.
മരച്ചില്ലകളില്‍ തട്ടിതെറിച്ചും തെങ്ങോലകളിലൂടെ ഒഴുകി ഒലിച്ചുമ് ചന്നം പിന്നം പെയ്യുന്ന ഇടവപ്പാതി മഴ.
പുഴയിലെക്കിറങ്ങുന്ന ചെങ്കല്‍പടവുകളിലേക്ക്, കലങ്ങി മറിഞ്ഞു വരുന്ന പുഴവെള്ളം എത്തിനോക്കുന്നുണ്ടാവും . ശ്രമിച്ചും പിന്‍വാങ്ങിയും വീണ്ടും ശ്രമിച്ചും പടവുകള്‍ ഓരോന്നും കയറി പുഴ നിറയുന്നുണ്ടാകും.